ഇങ്ങനെ തോല്ക്കാനാകുമോ, അവസാന ഓവറുകളില് അവിശ്വസനീയമായി തോറ്റമ്പി ഇന്ത്യ
ലണ്ടന്: പരമ്പര തൂത്തുവാരി ഇംഗ്ലണ്ടിന്റെ മണ്ണില് പുതിയ ചരിത്രം കുറിക്കാമെന്ന ഇന്ത്യന് വനിതകളുടെ മോഹം അവസാന ഓവറുകളിലെ സമ്മര്ദ്ദത്തില് എരിഞ്ഞടങ്ങി. കൈപ്പിടിയിലൊതുക്കിയ മൂന്നാം ട്വന്റി-20 മത്സരം അവിശ്വസനീയമായി കൈവിട്ട ഹര്മന്പ്രീത് കൗറും സംഘവും അഞ്ച് റണ്സിന്റെ ഞെട്ടിക്കുന്ന തോല്വി വഴങ്ങി. അവസാന രണ്ട് ഓവറില് ജയിക്കാന് 20 റണ്സ് മാത്രം മതിയായിരിക്കെ, ഏഴ് വിക്കറ്റുകള് കയ്യിലിരുന്നിട്ടും വിജയത്തിലെത്താന് ഇന്ത്യക്ക് സാധിച്ചില്ല. ഈ തോല്വിയോടെ അഞ്ച് മത്സരങ്ങളടങ്ങിയ പരമ്പര 2-1 എന്ന നിലയിലായി. ആദ്യ രണ്ട് മത്സരങ്ങളും ജയിച്ച ഇന്ത്യക്ക് പരമ്പര ഉറപ്പിക്കാനുള്ള അവസരമാണ് ഇതിലൂടെ നഷ്ടമായത്.
അവസാന ഓവറുകളിലെ നാടകീയത
172 റണ്സ് വിജയലക്ഷ്യം പിന്തുടര്ന്ന ഇന്ത്യ, 18 ഓവറുകള് പൂര്ത്തിയാകുമ്പോള് മൂന്ന് വിക്കറ്റ് നഷ്ടത്തില് 152 റണ്സെന്ന ശക്തമായ നിലയിലായിരുന്നു. പരിചയസമ്പന്നയായ നായിക ഹര്മന്പ്രീത് കൗറും (12 പന്തില് 18), വെടിക്കെട്ട് താരം റിച്ച ഘോഷും (7 പന്തില് 5) ക്രീസില്. 12 പന്തില് ജയിക്കാന് വേണ്ടത് 20 റണ്സ്. മത്സരം പൂര്ണ്ണമായും ഇന്ത്യയുടെ വരുതിയിലാണെന്ന് തോന്നിച്ച നിമിഷം.
എന്നാല് ഇസി വോങ് എറിഞ്ഞ പത്തൊന്പതാം ഓവര് കളിയുടെ ഗതി മാറ്റിമറിച്ചു. ഈ ഓവറില് റിച്ച ഘോഷിന്റെ നിര്ണായക വിക്കറ്റ് ഇന്ത്യക്ക് നഷ്ടമായി. ഏതാനും അവസരങ്ങള് ഇംഗ്ലീഷ് ഫീല്ഡര്മാര് നല്കിയിട്ടും അത് മുതലാക്കാന് ഇന്ത്യന് ബാറ്റര്മാര്ക്ക് കഴിഞ്ഞില്ല. ആ ഓവറില് വെറും എട്ട് റണ്സ് മാത്രമാണ് ഇന്ത്യക്ക് നേടാനായത്. ഇതോടെ അവസാന ഓവറിലെ വിജയലക്ഷ്യം 12 റണ്സായി ഉയര്ന്നു.
ലോറന് ബെല് എറിഞ്ഞ അവസാന ഓവറില് ഇന്ത്യന് പ്രതീക്ഷകള് തകര്ന്നു. സമ്മര്ദ്ദത്തില് പതറിയ ഇന്ത്യന് ബാറ്റര്മാര്ക്ക് ആറ് റണ്സ് നേടാനേ സാധിച്ചുള്ളൂ. അവസാന പന്തില് ജയിക്കാന് ആറ് റണ്സ് വേണമെന്നിരിക്കെ, അതുവരെ പിടിച്ചുനിന്ന നായിക ഹര്മന്പ്രീത് കൗറും പുറത്തായതോടെ ഇന്ത്യയുടെ പോരാട്ടം 166 റണ്സില് അവസാനിച്ചു.
മന്ഥനയും ഷെഫാലിയും നല്കിയ തകര്പ്പന് തുടക്കം
ഇന്ത്യന് തോല്വിയിലും തലയുയര്ത്തി നില്ക്കുന്നത് ഓപ്പണര്മാരുടെ പ്രകടനമാണ്. സ്മൃതി മന്ഥനയും ഷെഫാലി വര്മയും ചേര്ന്ന് നല്ല തുടക്കമാണ് ഇന്ത്യക്ക് നല്കിയത്. ഷെഫാലി വര്മ പതിവുപോലെ ആക്രമിച്ചു കളിച്ചപ്പോള്, മന്ഥന ക്ലാസ് ഇന്നിങ്സുമായി ഒപ്പം നിന്നു. ഷെഫാലി 25 പന്തില് നിന്ന് 47 റണ്സ് അടിച്ചുകൂട്ടി പുറത്തായപ്പോള്, മന്ഥന അര്ദ്ധസെഞ്ചുറി തികച്ചു. 46 പന്തുകള് നേരിട്ട മന്ഥന 59 റണ്സ് നേടിയാണ് മടങ്ങിയത്. ഇരുവരും ചേര്ന്ന് പടുത്തുയര്ത്തിയ മികച്ച അടിത്തറ മുതലാക്കാന് മധ്യനിരക്ക് കഴിയാതെ പോയതാണ് ഇന്ത്യക്ക് തിരിച്ചടിയായത്.
ഡങ്ക്ലിയും വ്യാട്ടും തകര്ത്താടിയപ്പോള്
നേരത്തെ, ടോസ് നേടി ബാറ്റിങ്ങിനിറങ്ങിയ ഇംഗ്ലണ്ടിന് സ്വപ്നതുല്യമായ തുടക്കമാണ് ലഭിച്ചത്. ഓപ്പണര്മാരായ സോഫിയ ഡങ്ക്ലിയും ഡാനിയേല് വ്യാട്ടും ചേര്ന്ന് ഇന്ത്യന് ബൗളര്മാരെ കണക്കിന് പ്രഹരിച്ചു. ഒന്നാം വിക്കറ്റില് ഇരുവരും ചേര്ന്ന് 137 റണ്സിന്റെ കൂറ്റന് കൂട്ടുകെട്ടാണ് പടുത്തുയര്ത്തിയത്. 53 പന്തില് നിന്ന് 75 റണ്സുമായി ഡങ്ക്ലിയും 42 പന്തില് നിന്ന് 66 റണ്സുമായി വ്യാട്ടും കളം നിറഞ്ഞാടിയപ്പോള് ഇംഗ്ലണ്ട് കൂറ്റന് സ്കോറിലേക്ക് കുതിക്കുമെന്ന് തോന്നി.
എന്നാല് ഓപ്പണര്മാര് പുറത്തായ ശേഷം ഇന്ത്യന് ബൗളര്മാര് മത്സരത്തിലേക്ക് ശക്തമായി തിരിച്ചുവന്നു. അരുന്ധതി റെഡ്ഡിയും ദീപ്തി ശര്മയും മൂന്ന് വിക്കറ്റുകള് വീതം വീഴ്ത്തി ഇംഗ്ലണ്ടിന്റെ മധ്യനിരയെയും വാലറ്റത്തെയും തകര്ത്തു. ഒരു ഘട്ടത്തില് 200 കടക്കുമെന്ന് തോന്നിച്ച ഇംഗ്ലണ്ടിനെ 20 ഓവറില് ഒന്പത് വിക്കറ്റ് നഷ്ടത്തില് 171 റണ്സില് ഒതുക്കാന് ഇന്ത്യന് ബൗളര്മാര്ക്ക് കഴിഞ്ഞു. എന്നാല്, ആ ബൗളിംഗ് മികവ് വിജയം കാണാന് മതിയാകുമായിരുന്നില്ല.
Article Summary
The Indian women's cricket team suffered a dramatic five-run defeat against England in the third T20I, failing to seal the series despite being in a commanding position. Chasing 172, India needed just 20 runs from the final two overs with seven wickets in hand. However, a stunning late-game collapse saw them manage only 14 runs, finishing at 166 for 5. Earlier, openers Smriti Mandhana (59 off 46) and Shafali Verma (47 off 25) provided a blistering start. For England, a massive 137-run opening partnership between Sophia Dunkley (75) and Danielle Wyatt (66) set a strong foundation, though a spirited comeback from Indian bowlers, led by Arundhati Reddy and Deepti Sharma with three wickets each, restricted them to 171/9. Despite the strong chase for most of the innings, India's inability to handle pressure in the final overs cost them the match, leaving the series poised at 2-1.
Author: Fahad Abdul Khader
A seasoned sports storyteller with over 10 years of experience captivating audiences. Fahad has managed sports desks at prominent Malayalam publishing platforms and brings a wealth of knowledge and passion to his writing.